B. L. JOSEPH DE L'ESCALE OU DE LA SCALE, gentilhomme François, fils de ce tant renommé en tous genres de doctrine Jules Cesar de la Scala dit Scaliger, tous deux issus des ducs de Veronne en Italie &c. Aucun ne peult doubter, que cetui-cy ne soit reputé l'un des plus doctes & sçavants gentils-hommes de France, soit pour les langues ou pour toutes sortes de disciplines: dequoy rendent un assez suffisant tesmoignage ses tant doctes oeuvres mis en lumiere sur divers subjects, en quoy il n'a point degeneré de son pere, estimé mesmes par ses ennemis le plus sçavant de nostre siecle. Cetui-cy Joseph de la Scala, n'a encores rien escrit en nostre langue Françoise, dont j'aye cognoissance, sinon quelques Poëmes qui ne sont en lumiere. Il florist cette annee 1584. & travaille sans cesse à illustrer les sciences par ses doctes escrits, tant en Philosophie qu'en Mathematiques.