Messire RENÉ DE BIRAGUE Chevalier, Chancelier de France, & depuis Cardinal soubs le Pape Gregoire 13. Commandeur de l'ordre des Chevaliers du S. Esprit instituee par le treschrestien Roy de France & de Polongne, Henry 3. du nom, &c. Il nasquit à Milan (ville capitale de la Lombardie) le 3. jour de Fevrier l'an 1507. & selon autres le 2. jour. Il estoit issu de la tant illustre & renommee famille des Biragues, laquelle florissoit il y a plus de trois cens ans. Il a fait imprimer la harangue qu'il prononça aux Estats tenus à Blois l'an 1577. imprimee à Paris audit an. Il mourut à Paris en son hostel le Ieudy 24. jour de Novembre l'an 1583. âgé de 76. ans & fut enterré le Mardy 6. de Decembre audit an dans l'Eglise de Saincte Catherine du Val des Escoliers à Paris. L'Oraison funebre prononcee sur sa mort par monsieur l'Archeuesque de Bourges messire Renault de Beaune, a esté imprimee à Paris l'an 1583. chez Gilles Beys, ensemble plusieurs epitaphes, imprimez chez Federic Morel, & outre celà monsieur de Maumont gentilhomme Lymosin a escrit en Latin un Eloge & bien ample discours de sa vie, lequel il fera bien tost imprimer, &c.