B. L. PIERRE DE PASCHAL gentilhomme du bas pays de Languedoc, homme tresdocte & grand historien Latin & François. Il a escrit l'histoire des Roys de France tant en Latin qu'en François, elle n'est encores imprimee. Il a mis en lumiere un discours des faits & gestes du Roy Henry 2. imprimé à Paris chez Vascosan, & encores asseure lon, qu'il a escrit les vies de plusieurs doctes hommes de France & autres. Je n'ay veu de ses oeuvres que la vie de Henry 2. & une oraison pour le seigneur de Mauleon qui fut tué en Italie. Plusieurs ont pensé que ledit Paschal promettoit beaucoup d'oeuures, & qu'il ne les avoit pas seulement commencez, comme entre autres Adrien Turnebe en son poëme qu'il a intitulé de la façon de faire son profit des lettres, traduit en François par Joachim du Bellay: mais je feray mention de cecy autre-part, & plus à propos. Il florissoit soubs Henry 2. l'an 1559. il a esté bien-aimé de Pierre de Ronsard, qui le loüe for en ses oeuvres, & autres aussi.