RICHARD DE VASSEBOVRG, Archidiacre de Verdun en Lorraine (qui est le lieu de sa nativité) homme des plus dignes de gloire pour le travail incomprehensible qu'il a pris à la structure & composition de ses doctes oeuvres, qu'il a mis en lumiere, qu'autre qui l'eust devancé: Et ceux qui se sont serviz de ses escrits, sans l'avoir nommé & recogneu pour leur principal guide, sont dignes du nom de Plagiaires. Mais pour venir à ses escrits, voicy ce que j'ay veu de luy. Le premier & second volumes des antiquitez de la Gaule Belgique, Royaume de France, Austrasie & Lorraine, avec l'origine des Duchez & Contez de l'ancienne & moderne Brabant, Tongre, Ardenne, Haynault, Mozelane, Lothreich, Flandres, Lorraine, Barrois, Lucembourg, Louvain, Vaudemont, Janville, Namur, Chiny & autres principautez &c. Le tout compris soubs les vies des Evesques de Verdun en Lorraine, recueillies par ledit Vassebourg, avec un abbregé des vies des Papes, Empereurs, Rois & Princes, depuis Jules Cesar, jusques à nostre temps. Il commença cet oeuvre en l'an de son âge 55. & de nostre salut 1541. comme il tesmoigne audit livre fol. 440. pag. 1. Les deux volumes susdits, ont esté imprimez à Paris par François Girauld l'an 1549. Il a escrit un livre des faits & gestes de Godefroy de Buillon, en la conqueste de Hierusalem, comme il tesmoigne en ses antiquitez de la Gaule Belgique fol. 257. Il florissoit soubs le regne de Henry 2. l'an 1549.