B. L. JAQUES DALECHAMPS, natif de Caën en Normandie, homme tres-docte en Grec, docteur en Medecine, & professeur d'icelle, en la ville de Lyon. Il est autheur d'un livre, intitulé la Chirurgie Françoise, imprimé à Lyon. Il a traduit de Grec en François, les livres de Galien, de l'usage des parties du corps humain, desquels fait mention Jaques Aubert Vandomois, en sa preface sur son livre des natures & complexions des hommes. Antoine du Verdier fait mention de luy en sa prosopographie, & Gabriel Chapuis aussi en ses additions au promptuaire des Medailles. Il florissoit à Lyon l'an 1580. Je ne parle point icy de sa docte version d'Athenee, d'autant que elle est en Latin, imprimee depuis un an à Lyon, ce que nous reservons à dire en nostre Bibliotheque Latine.