B. L. NICOLAS RAPIN, gentilhomme Poictevin, tres-excellent Poëte Latin & François, Vice-Senechal au bas pays de Poictou &c. Il a escrit plusieurs poëmes en François, & entre les autres une Ode saphique rithmee, sur la mort de Monsieur de Billy, Abbé de S.Michel en l'Herm, imprimee à Paris chez Pierre l'Huillier l'an 1582. avec l'Eloge dudit Jaques de Billy, qui mourut l'an 1581. Les plaisirs du gentilhomme champestre, avec plusieurs Sonnets amoureux, le tout imprimé à Paris chez la veufve de Lucas Breyer l'an 1583. avec un recueil de plusieurs autres poëmes, sur le mesme subject, escrits par plusieurs doctes hommes de France, lequel oeuvre s'intitule les plaisirs de la vie rustique &c. Plusieurs vers sur la pulce de Madame des Roches de Poictiers, imprimez l'an 1582. chez Abel l'Angelier, avec le recueil des autres autheurs qui en ont escrit. Chant 28. du Roland le furieux d'Arioste, monstrant quelle asseurance on doibt avoir aux femmes, traduit en François par ledit Nicolas Rapin, & imprimé à Paris chez la veufve Lucas Breyer l'an 1572. Je n'ay pas cognoissance de ses autres compositions en François. Je feray mention de ses Latines autre-part. Il florist en son pays de Poictou cette annee 1584.