Madame HENRIETTE DE CLEVES, fille & heritiere de messire François de Cleves , Duc de Nevers, Conte d'Eu & de Rhetelois, &c. femme de Messire Ludovic de Gonzague, Prince de Mantouë, &c. Cette dame de Nevers est non seulement recommandable, par la tresnoble & tresillustre maison de laquelle elle a pris origine, mais encores plus, pour les vertus qui reluisent en elle, accompagnees de tant de choses extremément louables, qui sont rares és autres Dames de telle & si grande maison (comme elle est) que tout celà bien consideré, lon jugera que je ne me suis point abusé, de parler d'elle en cette façon. Voicy donc ce qu'elle a traduit en nostre langue Françoise. L'Aminta du Seigneur Tasso, l'un des plus renommez Poëtes modernes de toute l'Italie. Elle n'est encore imprimee, j'entens de sa traduction: Car celle qui se voit mise en lumiere est d'autre version que celle de la susdite dame. Je n'ay cognoissance de ses autres escrits, soit de ses inventions ou traductions, pour n'avoir encores eu ce bien de la cognoistre ou frequenter en sa maison. Elle florit cette annee, 1584.