B. L. HIEROSME DE HANGEST, natif de Compiegne en Picardie, docteur en Theologie à Paris, Scholastiq, ou maistre d'escolle & Chanoine en l'Eglise de S. Julien du Mans, issu de la noble maison de Hangest en Picardie, lequel fut en fin grand vicaire de Monsieur le Cardinal de Bourbon Evesque du Mans. Il estoit homme for grand Philosophe, & Mathematicien. Il a escrit un livre en prose Françoise contre les heretiques de son temps, qu'il a intitulé le livre de lumiere Evangelique pour la S. Eucharistie. contre les Tenebrions, imprimé à Paris chez Jean Petit, l'an 1534. Il a escrit en vers François, un petit livre qu'il appelle le Jardin aux pensees, lequel il composa au mois d'Aoust l'an 1538. Il a composé plusieurs Cantiques, sur l'Advenement de nostre Seigneur, lesquels nous avons par devers nous escrits à la main. Il mourut l'an 1538. le 8. jour de Septembre, & est enterré en l'Eglise de S. Julien du Mans, en la chapelle du Sepulchre. Il a escrit plusieurs livres en Latin, lesquels ont esté imprimez à Paris.

H.D.C. Advocat à Lyon. Il a escrit un brief & utile discours sur l'immodestie & superfluité des habits, aveques deux oraisons Latines prises de Tite Live, l'une de Marcus Portius Cato Consul Romain, & l'autre de L. Valerius Tribun du peuple, &c. le tout a esté imprimé à Lyon l'an 1577. chez Antoine Gryphius, auquel temps il florissoit.