B. L. SCEVOLE DE SAINCTE-MARTHE, gentilhomme natif de Loudun en Poictou, Tresorier des finances du Roy audit pays de Poictou. Ce seigneur de Saincte Marthe est tellement heureux en ses compositions, & si bien né à la poësie Latine & Françoise, qu'il a bien merité de tenir les premiers ou seconds rangs, entre ceux qui se font admirer pour leurs beaux vers & doctes ouvrages, soit en Latin ou en François, comme il a monstré par ses bien limees & polies imitations du docte Poëte Italien Marcel Palingene, lequel il a traduit avec tant de grace, que celà a detourné plusieurs d'y mettre la main, qui auparavant s'estoient deliberez de le traduire en nostre langue. Il promet de continuer toute la version entiere du Zodiaque dudit Palingene, mais il n'en a fait imprimer encores qu'une partie, avec ses autres poësies Françoises, qu'il a intitulees Ses premieres oeuvres, contenant quatre livres d'imitations & traductions recueillies de divers Poëtes Grecs & Latins, imprimees à Paris chez Federic Morel l'an 1569. Il a fait imprimer plusieurs autres de ses poësies Latines & Françoises, reduites en deux volumes. Il florist cette annee 1584. Il prononça ces jours passez une tresdocte harangue devant le tresChrestien Roy de France Henry 3. touchant la suppression que sa maiesté deliberoit faire des Estats d'aucuns Thresoriers de France, mais elle n'est encores en lumiere.