B. L. JEAN BODIN Angevin, Advocat des plus doctes & renommez de tout le Parlement de Paris, maistre des requestes de Monsieur frere du Roy, homme for docte és langues, bien versé en toutes sortes d'histoires, sacrees ou prophanes, Poëte Latin, comme il a bien monstré en sa version des livres d'Opian autheur Grec, &c. Il a composé six livres de la Republique, imprimez à Paris chez Jaques du Puis à diverses fois, tant ce livre a esté bien receu & prisé de plusieurs, pour la varieté des choses qu'il contient. La Demonomanie des Sorciers, contenant quatre livres, avec les refutations de Jean Vvier medecin du Duc de Cleves &c. le tout imprimé à Paris chez Jaques du Puis l'an 1580. & autres diverses fois. Responses au Paradoxe de Monsieur de Malestroit, touchant l'encherissement de toutes choses, & le moyen d'y remedier, imprimees à Paris chez Martin le Jeune l'an 1568. & par autres diverses fois. Je n'ay pas cognoissance de ses autres compositions Françoises: quant à ses Latines, j'en ay parlé autre part. Il florist à Laon en Laonnois, au pays de Picardie cette annee 1584.