B. L. LOYS DES MASVRES Tournisien, ou de Tournay en la Gaulle Belgique, dit en Latin Ludovicus Masurius Nervius, & non pas de Tournus pres Mascon, ou de Tours en Touraine sur la riviere de Loyre, ou bien encores de tours en Auuergne, comme le pourroyent penser aucuns, à cause de ce mot doubteux de Tournisien &c. Ce qui m'a fait arrester sur cette explication, ç'a esté la dispute que j'en ay autresfois veu faire. Il estoit for excellent Poëte Latin & François. Il a traduit for heureusement, de Latin en vers François les douze livres de l'Eneide de Virgile, Prince des Poëtes Latins, imprimee à Paris, à Lyon & en autres en autres endroicts. Il a escrit plusieurs Tragedies sainctes, sçavoir est David combatant, David triomphant, David fugitif, toutes trois imprimees. Il a traduit de Latin en François un brief sommaire touchant la doctrine des sacrements, composé par Theodore de B. imprimé à Lyon l'an 1564. par Jean Dogerolles. Il a traduit de Latin en François, le livre des Eschets de Hierome Vida, tres-docte Poëte Italien, lequel livre s'intitule autrement la guerre cruelle du Roy Blanc, & du Roy Maure, ou More, imprimé à Paris.