B. L. NICOLAS DE NICOLAY, sieur d'Arfueille, & de Bel-air, gentilhomme Dauphinois, valet de chambre & Cosmographe du Roy, commissaire ordinaire de son artillerie, & a la description generale du Royaume de France. Il nasquit au pays du Dauphiné l'an 1517. Il est autheur d'une lettre missive, contenant le discours de la guerre faite par le Roy Henry second l'an 1549. pour le recouvrement du pays de Bollongnois sur la mer, imprimé à Lyon l'an 1550. par Guillaume Rouville. Les navigations, peregrinations & voyages faits en Turquie, contenant plusieurs singularitez veuës & observees par ledit Nicolay, le tout divisé en quatre livres, avec les figures au naturel, tant des hommes que des femmes, selon la diverfité des nations, leur port, maintien, habits & accoustrements, leurs loix, religion, & façon de vivre en temps de paix & de guerre, avecques plusieurs histoires memorables advenues de nostre temps, le tout imprimé à Venise, & depuis à Anvers par Guillaume Syluius l'an 1576. in 4. & contient 56. fueilles. Ce livre susdit a esté si bien receu de plusieurs nations, qu'il a esté traduit és langues, Italienne, Espagnolle, Angloise, & autres estrangeres. Il a davantage fait plusieurs cartes & descriptions geographiques, topographiques, & chorographiques, des pays, citez, chasteaux, & ports de Mer, avec le plan relevé de la cité de Constantinople, siege de l'Empire des Turqs, ensemble l'ordre, estat, offices, gages, & dignitez de la maison de leur Empereur, l'ordre qu'il tient en ses armees, tant par mer que par terre, & lors qu'il chemine par ses pays. Ces livres icy ne sont encores en lumiere. Il en fait mention en son Epistre au Roy, mise au devant de ses navigations. Il a traduit d'Espagnol en François, l'art de naviger de Pierre de Medine Espagnol, pilote du Roy d'Espagne, sur les Indes Occidentales, lequel il a illustré de plusieurs figures & annotations. Il a esté imprimé à Lyon chez Guillaume Rouville l'an 1554. & depuis à Roüen l'an 1577. chez Robert Mallard & autres. Il a recueilly, & reduit en forme de description hidrographique, & representé en carte marine, & routier ou pillotage, la navigation du Roy d'Escosse Jaques cinquiesme du nom, autour de son Royaume & Isles Hebrides & Orchades, avec les additions dudit Nicolay, touchant l'art de naviger, imprimé à Paris chez Gilles Beys l'an 1583. in 4. & contient douze fueilles. S'il a escrit & composé autres oeuvres que les susdites, je m'asseure que ses parents & aliez, les mettront en lumiere, pour le bien & soulagement du public, & entre-autres ses cartes ou descriptions particulieres de plusieurs nations de France, lesquelles j'ay veuës escrites & peintes de sa main, & faites par son industrie. Il mourut à Paris, du mal de gravelle, ou calcul, l'an 1583. le Vendredy 25. jour de Juin, âgé de 67. ans, & fut enterré le jour ensuyvant en l'Eglise de S. Sulpice, à costé gauche du grand autel, és fauxbourgs de S. Germain à Paris &c.