Messire JEAN DE JOUVILLE, OU DE IONVILLE Chevalier, sieur dudit lieu, & Seneschal de Champagne, appellé par aucuns Jean sire de Ionuille. Il fut au service du Roy S. Loys l'an 1270. par l'espace de 32. ans. Il a escrit une histoire tresample de la vie, faits & gestes du Roy S. Loys son maistre, laquelle nous avons par devers nous escrite à la main sur parchemin en langage François usité pour lors. Cette histore a esté depuis imprimee à Poictiers par les De-Marnefs. Loys Lasseré grand maistre du College de Navarre fondé à Paris, &c. lequel florissoit l'an 1520. (comme nous dirons en son lieu) a escrit l'histoire dudict S. Loys, & advoüe s'estre aydé en celà de laditte Chronique du Sire de Ionuille, comme aussi a fait Josse Clitoue, Chanoine de Chartres dit Jodocus Clitoueus, &c. L'histoire dudit Roy S. Loys escrite par Loys Lasseré Tourangeau, se voit imprimee avec le grand volume qu'il a fait imprimer à Paris touchant la vie de S. Hierosme, du temps de Loys 12. & soubs François 1.

SIMON DE JOINVILLE. Il a escrit la vie du Roy S. Loys, voy cy devantJean Syre de Ionuille, Seneschal de Champagne: car ceux qui l'ont appellé Simon, se sont trompez & abusez en celà.