B. L. SIMPHORIEN CHAMPIER Lyonnois, dit en Latin Campegius, seigneur de la Faverge, Conseiller & premier Medecin du Duc de Lorraine, de Bar, & de Calabre, &c. Ledit Champier estoit chevalier de l'ordre de S. Georges en la maison des Ducs de Lorraine, &c. Il avoit un fils nommé Claude Champier sieur de la Bastie, Corcelles & la Faverge &c. duquel nous avons parlé cy devant à la lettre de C. Le susdit Symphorian a escrit en François la vie du Capitaine Bayard gentilhomme sieur dudit lieu en Dauphiné, surnommé Pierre de Terrail, &c. imprimee en l'an de salut 1526. Le fondement & origine des tiltres de noblesse, imprimé à Paris l'an 1535. La nef des Dames vertueuses, imprimee à Paris l'an 1531. chez Philippes le Noir. La nef des Princes, imprimee à Paris. La nef des Sybilles & leurs propheties & predictions. Les grandes Chroniques des gestes & vertueux faits des Ducs & Princes de Savoye & Piedmont, &c. imprimees à Paris par Jean de la Garde l'an 1516. Les Chroniques de Lorraine, imprimees. Le Triomphe de France, escrit en Latin & en François, imprimé à Lyon & à Paris. L'orde de Chevalerie, duquel il fait mention en la vie du capitaine Bayart. Le miroir des apotiquaires, imprimé à Paris l'an 1539. Il a escrit plusieurs tresbeaux & tresdoctes livres en Latin, desquels j'en ay plus d'une douzaine de volumes, imprimez à Lyon & à Paris: mais nous ferons mention de celà autre part. Il florissoit du temps du Roy Loys 12. l'an 1507. & soubs François 1. l'an 1515.