B. L. JEAN DES CAVRES, natif de Moreul en Picardie, principal du college d'Amiens, & Chanoine en l'Eglise de S. Nicolas en laditte ville d'Amiens, &c. Il a mis en lumiere un for docte & bien laborieux ouvrage, lequel il a intitulé morales, divisé en plusieurs livres, lesquels contiennent une infinité d'Histoires tresmemorables de beaucoup de beaux exemples vertueux, lesquels il a recueilly de plusieurs autheurs Grecs & Latins tant anciens que modernes. Le tout imprimé à Paris pour la premiere fois chez Guillaume Chaudiere l'an 1575. & depuis augmentez de plus de la moitié par ledit Jean des Caures, & imprimez l'an 1583. chez ledit Chaudiere. Advertissement & remonstrance à gens de tous estats, pour subuenir aux povres en temps de charté & de famine. Sermon des circonstances que doit avoir l'aumosne. Traicté de la Charité, tendant à mesme fin, escrit en vers François, le tout imprimé à Paris chez Guillaume Chaudiere l'an 1574. Il florist à Amiens en Picardie cette annee 1584. & ne cesse de profiter au public tant par ses doctes escrits, que pour l'instruction qu'il donne à la jeunesse, qu'il a en charge en son College audit lieu d'Amiens.

B. L. JEAN DES CAVRES, Principal du College d'Amiens, (comme nous avons dit cy devant parlant de luy.) Il a escrit & composé de son invention plusieurs livres, desquels s'ensuivent les tiltres, que nous avions obmis icy dessus. Les premiers Elemens de la pieté Chrestienne. Opuscule de la Croix de nostre seigneur Jesus Christ. Un recueil d'aucunes sentences notables extraictes de celles de Nil Evesque & martir, & traduites de Latin en vers François. Exhortation & institution à la fille Chrestienne, imprimée à Paris chez Guillaume Chaudiere 1573. Traicté spirituel, contenant une brefve institution pour guider & conduire la jeunesse à la voye de perfection Chrestienne. Un petit traicté de la conservation de santé en vers François, imprimé à Paris chez Guillaume Chaudiere 1575. Deux eclogues sur le mariage de hault & puissant Seigneur messire Gilles de Mailly, & illustre Dame madame Marie de Blanchefort, imprimé à Paris chez Guillaume Chaudiere 1575. Odes sur l'heureux advenement & sacre de Reverend Pere en Dieu messire Geoffroy de la Martonie, Evesque d'Amiens, imprimé à Paris, chez Guillaume Chaudiere 1577. La vraye forme & maniere de vivre des Chrestiens en tous estats. La remonstrance que feit Jacob à ses enfans un peu au paravant qu'il rendit l'esprit, accompagnee de celles de ses douze enfans Patriarches, & de Tobie à son fils, imprimée à Paris chez Guillaume de la Nouë 1577. Les Dialogues, ou Colloques de Mathurin Cordier, illustrez en plusieurs endroits de Scholies Chrestiennes, imprimez à Paris chez Michel de Roigny 1578. Livres non encores imprimez. Oeuvres morales, ou discours sacrez, contenans une institution en bonnes moeurs, comme chacun se doit bien & sagement gouverner en toutes actions humaines, & en quelconques charges & occupations publiques & particulieres. Discours sacrez comprins en trois livres. Le premier, Contenant, comme l'Eglise Chrestienne, depuis la nativité du fils de Dieu, jusques à ce temps present, a esté persecutee par les Juifs, Empereurs, Rois, Princes, Ethniques, & autres defaillans de la foy, la fin malheureuse d'iceux, comme au milieu de tant de changemens des Royaumes & emotions violentes, Dieu l'a tellement preservee, qu'elle demeure saine & sauve, & demeurera perpetuelle. Le second, Traictant de l'astuce de Sathan, lequel voyant que par les tourmens des corps il ne sçavançoit en rien, a introduit en la famille du Sauveur des Schismes & heresies, pour empoisonner & engloutir les enfans de Dieu. Letroisieme, Contenant le moyen de porter patiemment la spatieuse Mer des persecutions & afflictions qui arrivent ordinairement aux Chrestiens. Histoire naturelle de l'homme, & des parties d'iceluy qui sont le corps & l'ame. Oeuvre utile & profitable à tout homme pour apprendre à se bien cognoistre soy-mesme, à se bien mesurer de la mesure de sa propre nature, pour se sçavoir bien contenir dedans les limites d'icelle, & entendre plusieurs poincts difficiles de la Theologie, Philosophie, Medecine & Chirurgie. Petit Catechisme, ou composition familiere des poincts principaux, & mysteres signalez de la doctrine Chrestienne, en forme de dialogue. La Tragedie de David, combatant Goliath. Il florist en la ville d'Amiens cette annee 1584. Et quant à ses compositions Latines, j'en feray mention dans ma Bibliotheque Latine.