B. L. FRANCOIS D'AMBOISE Parisien, premierement Advocat au Parlement de Paris, & depuis Conseiller du Roy au Parlement de Renes en Bretagne, frere aisné d'Adrian d'Amboise, docteur en Theologie, duquel nous avons parlé cy dessus, &c. Ledict François a escrit plusieurs oeuvres, tant en Latin qu'en François, soit en prose ou en vers, ayant cognoissance de beaucoup de langues, & ayant voyagé en divers païs loingtains. Il a escrit dés ses plus jeunes ans, plusieurs Tragedies & Comedies, & entre autres un livre intitulé Amours Comiques, contenant plusieurs histoires facetieuses, entre lesquelles est celle qu'il appelle les Neapolitaines, imprimee à Paris chez Abel l'Angelier l'an 1584. Francion, qui est un oeuvre à l'imitation des livres d'Amadis de Gaule, non encores imprimé. Panegyrique sur le mariage de Monsieur le Duc de Guise, Henry de Lorraine, & de Madame Catherine de Cleves, Contesse d'Eu, imprimé à Paris chez Nicolas du Mont l'an 1570. Theralogue ou Eglogue Forestiere, au Roy, imprimee à Paris chez Malot l'an 1571. Elegie sur le trespas de Messire Anne de Montmorency, Connestable de France, & autres poësies dudict autheur, le tout imprimé à Paris chez Rouvile l'an 1568. Huict livres des amours de Clion, desquels il se voit un Poëme, qu'il intitule les desesperades ou Eglogues amoureuses, imprimees à Paris chez Nicolas Chesneau l'an 1572. Le tombeau de M. Bourdin, procureur general du Roy à Paris. Trois Tragedies, quatre Comedies. Dialogue & devis des Damoiselles, imprimé à Paris par Robert le Mangnier l'an 1583. soubs un nom deguisé, de Thierry de Timophile G. Picard. Soubs lequel nom il a autrefois traduit d'Italien en François les regrets funebres de quelques animaux, imprimez l'an 1576. Ensemble la Comedie des Neapolitaines, dont nous avons parlé cy dessus. Il a escrit plusieurs oeuvres Latins, desquels nous parlerons autre part. Il florist à Paris cette annee 1584.

THIERRY DE TYMOPHILE, gentilhomme Picard, (qui est un nom supposé & deguisé) & soubs lequel plusieurs livres ont esté mis en lumiere par François d'Amboise Parisien (comme nous avons dit cy dessus) & entre-autres la comedie Françoise, intitulee Les Neapolitaines, imprimee chez Abel l'Angelier l'an 1584. Le Dialogue & devis des damoiselles, imprimé chez Robert le Mangnier. Les regets funebres de quelques animaux, traduit d'Italien en François, imprimé à Paris chez Nicolas Chesneau.