B. L. FRANCOIS BALDUIN, natif d'Arras en la Gaule Belgique, docteur és droicts, l'un des plus grands Jurisconsuls, Theologien, & Historien de nostre temps, &c. Conseiller & maistre des Requestes de Monsieur le Duc d'Anjou, à present Roy de France, son pere s'appelloit Antoine Bauduin, ou Balduin, Conseiller & premier Advocat du Roy à Arras, auquel lieu ledict François Balduin nasquit le premier jour de Janvier l'an 1520. Il a escrit plusieurs oeuvres en Latin, desquels nous ferons mention autre part. Il a composé un Panegyric sur le mariage du Roy, lequel il prononça à Angers, en la presence de Messieurs les gens du Roy dudict lieu, imprimé à Angers chez René Picquenot l'an 1571. Discours sur le fait de la reformation de l'Eglise, imprimé l'an 1564. avec la response d'un grand seigneur, auquel il l'adressoit. L'Histoire d'Anjou, non encores imprimee. Proposition d'erreur, sur les memoires d'Anjou, lesquels ne sont imprimez. Il a escrit plusieurs Genealogies, non encores imprimees, & autres memoires, sur le droit & appartenances d'aucunes nobles familles de France, comme entre-autres de celle de Bourbon, Navarre, Lorraine, Anjou, Bourgongne, Montmorency, & plusieurs autres. Ces memoires ou recueils d'histoires ne sont encores imprimez, ils se voyent és cabinets d'aucuns grands seigneurs de France, & autres hommes curieux de telles richesses. Advis sur le fait de la reformation Ecclesiastique, avec la response à un predicant calomniateur, lequel soubs un faux nom & tiltre d'un Prince de France, s'opposa à l'advis susdict. C'est le tiltre du livre imprimé à Paris chez Nicolas Chesneau l'an 1576. Il mourut à Paris le vintg quatriesme jour d'Octobre l'an 1574. âgé de cinquantetrois ans, neuf mois 24. jours, & fut enterré en l'Eglise des Mathurins à Paris.