B. L. GUILLAUME CHRESTIEN natif d'Orleans, docteur en Medecine à Paris, premierement Medecin de monsieur le Duc de Boüillon, & depuis du Roy Henry 2. &c. Il a traduit un traité d'Hippocrat, de la geniture & generation de l'homme, avec le traité de Jaques du Bois dit Syluius, touchant les mois des femmes, des maladies provenantes d'iceux, & de leur cure ou garison, imprimé à Paris chez Guillaume Morel. traité intitulé Philalethes, sur les erreurs anatomiques de certaines parties du corps humain, reduites & colligees selon la sentence de Galien par ledit Guillaume Chrestien, imprimé à Orleans l'an 1536. & à Lyon aussi en laditte annee. Il a escrit beaucoup d'oeuvres en Latin, desquelles il y en a quelquesunes en lumiere, le reste pourra estre imprimé s'il plaist à Florent Chrestien son fils de les publier, pour le soulagement des amateurs de la Medecine. Il florissoit l'an 1550. soubs Henry 2.

GUILLAUME CHRESTIEN docteur en Medecine pere de Florent Chrestien. Il a traduit de Grec en François (outre les oeuvres que nous avons deduites icy dessus) les sept livres de la methode terapeutique de Galien imprimez à Paris chez Denis Janot.