B. L. CHRESTOFLE LONGUEIL, dit Longolius, natif de Malines en Brabant en la Gaule Belgique, & non pas de Paris comme plusieurs ont escrit, &c. Citoyen de Rome, &c. Il a esté estimé de son temps le plus grand Orateur & mieux parlant Latin. Il estoit bien versé en plusieurs sciences, & avoit bonne cognoissance de la langue Françoise, en laquelle il a escrit une oraison des loüanges du Roy S. Loys, & de la nation Françoise, escrite par ledict Longolius en langue Latine, & par luy-mesmes traduite en François, laquelle il dedia au Roy François 1. l'an 1510. estant pour lors Conte d'Angoulesme: cette oraison ne se trouve imprimee en François, mais en Latin, & plusieurs autres siennes tres-doctes Epistres, oraisons, & autres livres en Droict, desquels je feray mention dans ma Bibliotheque Latine. Il mourut l'an 1522. agé de 34. ans. Il est enterré en l'Eglise des Cordeliers de Padouë en Italie, comme luy-mesmes l'avoit ordonné par son testament.