RENÉ TARON Advocat du Roy au Mans, frere aisné de Jean Taron sieur de la Roche, Conseiller du Roy au Mans, & encores de Monsieur Taron, chanoine en l'Eglise de laditte ville du Mans, &c. Il estoit Poëte François & Orateur, & encores plus grand Theologien. Il a traduit de Latin en François l'Apocalypse de S. Iean, laquelle n'est encores imprimee. Elle se voit escrite à la main avecques les commentaires dudit Taron sur icelle Apocalypse, le tout escrit de la main de Maistre Nicole Manceau sieur de la Gaudiniere grand amy dudit René. Ce livre fut baillé à Claude de Tesserrand gentilhomme Parisien, pour le faire imprimer, & pour cet effet il l'envoya à Lyon, mais pour tout cela il n'est encores en lumiere. Il a escrit plusieurs vers François, tant pour servir de prieres à Dieu, que sur autres subjects des troubles de France, &c. non encores imprimez. Il mourut en la ville d'Alençon à dix lieuës du Mans l'an 1567. le 18. jour de May. Madame la Baillifve de Sillé au Maine estoit mere des susdits: ce que je repete expressement, pour ce qu'elle estoit estimee l'une des plus belles, sages & aprises dames de tout son temps, & qui avoit un jugement & esprit des plus esmerveillables, comme mesmes lon peut voir par le livre de Jaques Pelletier du Mans, & de Nicolas Denisot soubs le nom de Bonaduenture des Periers, intitulé Les nouvelles recreations. Nous avons fait tresample mention cy devant du susdit sieur de la Rochetaron son frere à la lettre J.