MACÉ OGIER prestre, maistre de la maison des Ardants, situee en la ville du Mans &c. natif de la Champagne du Maine. Il est autheur de la carte, ou description generale de tout le pays & Conté du Maine, laquelle fut gravee en planches de cuyvre par Jaques Androüet Parisien, surnommé du Cerceau, & imprimee au Mans l'an 1539. par Mathieu de Vaucelles & Alexandre Chouen, & encores l'an 1565. par ledit Vaucelles. Ce qui est contenu en ladite carte a depuis esté reduit en livre, & imprimé par Hierosme Olivier l'an 1559. & auparavant chez Louis Gaingnot l'an 1558. suyvant les memoires qui furent trouvez en la Bibliotheque dudit Macé Ogier, apres sa mort. Il florissoit du temps de François premier l'an 1530.