B. L. JEAN PELLETIER, natif de la ville & cité du Mans, docteur en Theologie, grand maistre du college Royal de Navarre, fondé à Paris, Curé de S. Jaques de la Boucherie en ladite ville, homme des plus renommez pour la Theologie scholastique qu'autre de sa faculté, & ce qui fut cause qu'il fut envoyé au Concile de Trente dernier. Il estoit frere aisné de Jaques Pelletier du Mans, docteur en medecine, duquel nous avons parlé cy devant. Je n'ay point veu les escrits François dudit Jean le Pelletier, encores que je sçache qu'il en ayt composé quelques-uns, lesquels ne sont encores en lumiere. Je feray mention de ses escrits Latins, en ma Bibliotheque Latine. Il mourut à Paris le vingt huitiesme jour de Septembre l'an 1583. & fut enterré le jour ensuyvant en l'Eglise de sainct Estienne du Mont pres de Saincte Geneviefve à Paris.