B. L. ANDRÉ DE ROSSANT, Lyonnois, Poëte Latin & François. Il est autheur de la remonstrance au peuple de Flandres, escrite en vers François, en faveur de Monsieur fils & frere du Roy &c. imprimee à Paris chez Chevillot l'an 1582. l'Onomastrophie, en laquelle il traicte amplement, de la maniere de faire des Anagrammes, non encores imprimé. Il florissoit à Paris l'an 1582.

B. L. ANDRÉ DE ROSSANT Lyonnois, homme docte & bien versé en la poësie Latine & Françoise. Il a escrit & composé (outre les oeuvres que nous avons recitees icy devant) de tres-amples commentaires sur les amours d'Olive, composez par Joachim du Bellay Angevin, & contiennent tant de matieres diverses, que s'ils estoyent imprimez, ils passeroyent la grosseur d'un juste volume. Il florist cette annee 1584. Je n'ay pas cognoissance de ses autres escrits ou compositions Françoises, & quant à ses Latines, j'en feray mention autre-part.