B. L. JAQUES AMIOT, natif de Meleun sur Seine pres Paris, premierement Abbé de Bellosane, & de S. Cornille, & maintenant Evesque d'Auxerre en Bourgogne, Precepteur du Roy Charles 9. & son grand Aumosnier, & encores de Henry 3. à present regnant. La renommee de ce personnage est tellement espandue, non seulement par la France, mais en tous les autres lieux où nostre langue Françoise a cours, qu'il a emporté la gloire, du plus sçavant & plus fidel traducteur des oeuvres de ce divin, & tant renommé Plutarque, & des autres oeuvres qu'il a traduites, des autheurs Grecs, en nostre langue Françoise: ce que mesmement ont esté contraints d'advoüer ceux qui par autre part ne luy sont pas amis. Voicy donq ce qu'il a traduit du susdit Plutarque. Les Vies des plus illustres hommes Grecs & Romains, imprimees à Paris par Vascosan, Frederic Morel & autres. Les Opuscules Morales de Plutarque, imprimees chez les susdits & en autres lieux. Plusieurs livres de Diodore Sicilien, autheur Grec, ont esté traduits par ledit sieur Amiot, & imprimez à Paris par Vascosan. L'histoire AEthiopique d'Heliodore autheur Grec, imprimee plusieurs fois. Il a traduit plusieurs tragedies Greques en vers François, non encores imprimees. Toutes ses oeuvres s'impriment chez Federic Morel cette annee 1584. reveües & augmentees par luy. Il florist à Paris cette annee 1584. & avons esperance de voir encores de ses doctes traductions d'Autheurs, tant sacrez que prophanes.