B. L. NICOLAS VIGNIER docteur en Medecine, natif de Bar sur Seine, frere de monsieur Vignier Prevost dudit lieu de Bar, &c. Il a escrit en quatre livres, un sommaire de l'histoire des François, recueilly des plus certains autheurs antiques, imprimé à Paris chez Sebastien Nivelle in fol. l'an 1579. ce livre est plain de belles recherches de tiltres ou enseignements pris des tresors, chapitres & Eglises ou autres lieux esquels sont demeurez les registres de plusieurs choses memorables. Table de l'Estat & origine des anciens François, imprimee à Troye en Champagne l'an 1582. chez Claude Garnier in 4. & contient 15. fueilles avec privilege du Roy pour dix ans. La Bibliotheque historiale, contenant la disposition & concordance des temps & des histoires, ensemble l'estat des plus renommees Monarchies & principautez de la terre. Les Fastes des anciens Romains, Grecs & Hebreux. Traicté de l'an & de ses parties: Ces livres dont j'ay fait mention cy dessus, ne sont encores imprimez, mais j'en ay veu le catalogue compris dans le privilege de son traicté de l'estat & origine des anciens François, &c. Il florist cette annee 1584. & devons esperer de luy plusieurs beaux & doctes livres, car il est extremement bien versé en l'histoire, & sur toutes, en celle de nostre France: je parleray de ses oeuvres en Latin autre-part.