Mad. MADELENE DE L'AVBESPINE, fille de monsieur le Secretaire de l'Aubespine, & femme de messire Nicolas de Neufuille, seigneur de Villeroy, premier Secretaire d'estat, &c. (duquel nous avons fait mention cy devant à la lettre N.) cette dame est si heureuse à composer en prose & en vers, & a l'esprit & le jugement si rares, qu'elle attire un chacun à la contemplation de tant de vertuz qui reluysent en elle, lesquelles elle a comme par succession de ceux desquels elle a pris origine, & pour faire preuve de ce que j'ay dit touchant son sçavoir & doctrine, j'allegueray sa traduction des Epistres d'Ouide lesquelles elle n'a encores fait imprimer, non plus qu'une infinité de poëmes de son invention, lesquelles sortiront en lumiere quand il luy plaira. Elle florist cette annee 1584.