JEAN THIBAVLT Medecin ordinaire du Roy François 1. & son Astrologue. Il a escrit le thresor du remede preservatif, & guerison bien experimentee de la Peste, & fiebvre pestilencielle, avec la declaration dont procedent les gouttes naturelles, & comme elles doibvent retourner avec receptes pour le mal caduc, pleuresies & apoplexies, & ce qu'il appartient de sçavoir à un parfait Medecin, le tout imprimé ensemble à Paris l'an 1544. La grande & merveilleuse prophetie trouvee en la librairie dudit Thibault, apres sa mort, commençant l'an 1545. jusques en l'an 1556. imprimee au Mans par Denis Gaingnot, l'an 1545. Il a escrit plusieurs autres prognostications, sçavoir est pour les annees 1539. 1540. 1541. 1542. 1543. & 1544. toutes imprimees à Paris & au Mans. Les tables du Soleil & de la Lune, selon leur mouvement d'heures, de jour à autre, calculees par ledit Jean Thibault, imprimees à Paris par Chrestien Wechel. Ledit autheur promet en son epistre à Monsieur le Cardinal de Lorraine, deux livres pour cognoistre les mutations des vents, gresles, pluyes, tonnerres, & tempestes, & les lieux où seront leurs effects. Il a escrit un autre livre ou table de la dignité des planettes & maisons de la lune, non encores imprimé. Il florissoit l'an 1544. auquel il mourut, ou environ ce temps là.