PHILEBERT DE LORME Lyonnois, Conseiller & Aumosnier du Roy Charles neufiesme, Abbé de S. Eloy pres Noyon en Picardie, & de sainct Serge ou Sierge pres Angers, architecte ou intendant des bastiments du Roy, & de la Roine sa mere, Catherine de Medicis, tant au Louvre qu'aux Tuilleries, Anet & sainct Maur des Fossez, & autres chasteaux & maisons sumptueuses, desquelles il a esté conducteur de l'oeuvre entier, ou bien les a parachevees & redressees par son industrie. Il a escrit plusieurs beaux & doctes livres, touchant l'architecture & façon de bastir, imprimez à Paris chez Federic Morel l'an 1569. Traicté de la nouvelle façon de bien bastir, & à petits fraiz. Il a escrit plusieurs autres livres d'architecture, & a inventé une nouvelle façon de charpenterie pour couvrir les maisons. Loys le Roy, dit Regius, fait tres-honorable mention dudit Philebert de Lorme, en son livre de la vicissitude des choses, ensemble Antoine Mizault, dit Mizaldus, és livres qu'il luy a dediez, imprimez à Paris chez Federic Morel &c. Ledit Architecte florissoit soubs Charles neufiesme l'an 1567.