B. L. JAQUES GOHORRY Parisien, surnommé le Solitaire, lecteur ordinaire és Mathematiques à Paris, philosophe & grand Chimiste &c. Il s'appelle en plusieurs de ses oeuvres, tant Latins que François, Leo Suavius, Solitarius &c. Il a fait imprimer plusieurs de ses oeuvres, sans y mettre autre chose que ces trois lettres J.G.P. qui est à dire Jaques Gohorry Parisien, ou bien n'y mettant que cette devise, Envie, d'envie, en vie &c. Il a traduit de Latin en François, le premier & second livres, de la premiere decade de Tite Live Padoüan, imprimez à Lyon chez Balthazar Arnoulet l'an 1553. lesquels il appelle autrement, Decades Romaines, & les discours Italiens, formez sur icelles. Il a traduit les sept livres de l'art militaire, de Nicolas Machiavel Florentin, escrits par luy en langue Toscane, & depuis faits Latins par Jean Morel Parisien. Il a traduit quelques livres d'Amadis de Gaule, d'Espagnol en François, sçavoir est, le 10.11. & 13. imprimez à Paris chez Robert le Mangnier l'an 1560. & 1563. & à autres diverses fois. Le susdit Gohorry promettoit d'escrire l'histoire de France, mais elle n'est en cores en lumiere. Il a traduit de Latin en François, les Occultes merveilles & secrets de nature de Levin Lemne, Medecin de Zirizee en Hollande, imprimez à Paris l'an 1567. par Pierre du Pré. Ce livre a esté aussi traduit par Antoine du Pinet, & imprimé à Lyon. Il a escrit en prose, le devis sur la vigne, vin & vendanges, auquel la façon ancienne du plant, labour, & garde, est descouverte & reduite au present usage, imprimé à Paris par Vincent Sertenas l'an 1549. Il a mis par escrit & reduit par ordre l'histoire de Jason, laquelle René Boyuin, d'Angers, (tres-excellent homme pour le burin,) a gravee en planches de taille douce. C'est le livre de Jean de Monregard, de la conqueste de la Toison d'or, par le prince de Thessalie, imprimee à Paris l'an 1563. avec les figures, comme nous dirons cy apres en son lieu, parlans dudit Jean de Monregard. Commentaires dudit Gohorry, sur un livre François, intitulé la Fontaine perilleuse, avec la chartre d'Amours, autrement intitulé le songe du Verger, imprimez à Paris l'an 1572. par Jean Ruelle. Il a escrit un discours responsif à celuy d'Alexandre de la Torrette, sur les secrets de l'art Chimique, & confection de l'or potable, fait en la defense de la philosophie, & medecine antique, contre la nouvelle Paracelsique, soubs le nom de L.S.S. qui est à dire Leo Suavius, Solitarius, imprimee à Paris chez Jean de l'Astre 1575. Instruction de la cognoissance des vertus & proprietez de l'herbe, nommee Petum, appellee en France, l'herbe à la Roine ou Medicee, ensemble la racine Mechoacan, ou Mechiocan, &c. imprimee à Paris chez Jean Parent l'an 1580. Il peut avoir escrit plusieurs autres oeuvres desquels je n'ay pas cognoissance: & en aussi beaucoup fait en Latin, mais nous en parlerons autrepart. Il mourut à Paris le Ieudy 15. jour de Mars l'en 1576. Il est enterré en l'Eglise des Cordeliers à Paris, comme il avoit ordonné par son testament, autres disent que c'est à S. Estienne du mont.