B. L. JEAN TARON sieur de la Roche, Conseiller du Roy au siege Presidial & Seneschaussee du Maine, &c. frere puisné de M. René Taron autrefois Advocat du Roy au Mans, (duquel nous ferons mention cy apres en son lieu.) Ce seigneur de la Roche-Taron, outre sa profession du droit s'est pleu autresfois à la Poësie Latine & Françoise, & mesmement il se voit quelques uns de ses vers, és oeuvres de JaquesTahureau gentilhomme du Maine. Outre cela, il est beaucoup à estimer pour la grande & louable curiosité, qui est en luy de faire amaz de toutes sortes de beaux & doctes livres, desquels sa Bibliotheque est tellemement enrichie, qu'elle est estimee l'une des plus belles & plus riches qui soit au Maine voire en Anjou & Touraine, non seulement pour les belles & propres relieures ou couvertures de ses livres, mais pour avoir choisi les plus beaux & plus corrects exemplaires, à quelque prix qu'ils ayent esté. Il florist au Mans cette annee 1584. & n'a encores fait imprimer aucuns de ses oeuvres, que j'aye peu sçavoir. Il peut quand il voudra en escrire de bien for beaux sur plusieurs differents subjets, estant homme docte, & ayant tant de beaux livres en sa possession: ce que je pense qu'il fera, ayant donné relasche aux affaires de sa principalle estude, qui est en la Jurisprudence.