FRANCOIS SAGON, natif de Roüen en Normandie, surnommé l'indigent de Sapience, domestic de M. Felix de Brie, abbé de S. Euroul en Normandie, & grand doyen en l'Eglise de S. Julien du Mans. Il a esté de son temps, comme le fleau ou verge de Clement Marot, contre lequel il a escrit beaucoup de vers, lesquels se voyent imprimez. Il a escrit le chant de la Paix, fait entre le roy Henry deuxiesme, & Philippes Roy d'Espagne, imprimé à Paris par Barbé Regnault. La resjouissance du traicté de Paix en France, publiee l'an 1559. imprimee à Paris par Olivier de Harsy audit an 1559. Recueil d'Estrenes dudit François Sagon pour l'an 1538. imprimé à Paris audit an. Recueil moral d'aucuns chants Royaux, Ballades & Rondeaux dudit Sagon, presentez à Roüen, à Diepe & à Caën, Nous les avons par devers nous escrits à la main. Il a composé tous, ou la plus grande partie des Epitaphes, qui se voyent en la chapelle du Chasteau de Serrant en Anjou, à trois lieuës d'Angers, faits en l'honneur des sieurs dudit Serrant, surnommez de Brie, qui est une for ancienne & tres-noble maison. Il florissoit l'an 1538. soubs François premier, & encores soubs Henry second.

MATHIEV DE BOUTIGNY, page de Maistre François de Sagon, Secretaire de l'Abbé de Sainct Euroul, qui est un nom supposé touchant ledit Boutigny (comme il semble) Il a escrit en vers François le Rabais du caquet de Frippellippes, & de Marot dit Rat-pelé, additionné avec les comments, imprimé à Paris il y a pres de 50. ans. Ce sont toutes invectives faites par Sagon ennemy de Clement Marot.