CLEMENT MAROT, natif de Cahors en Quercy, pres Tolose, fils de Jean Marot, natif de Caën en Normandie, tous deux tresexcellents Poëtes François &c. Ledict Clement fut valet de chambre du Roy François premier, soubs lequel il a escrit plusieurs Poëmes, & estoit estimé le premier de son siecle, & peult estre de ceux qui viendront apres luy. Il a traduit les Psalmes de David, selon la traduction que luy en faisoit en prose Françoise Melin de S. Gelays, & autres hommes doctes de ce temps-là. Il a escrit plusieurs Elegies, Epitaphes, Epigrammes, & autres genres de poësie Françoise, imprimees en plusieurs endroicts de France, & à diverses annees. Il a escrit le sermon du bon & mauvais pasteur, imprimé. Il a escrit quelques chants royaux, à l'honneur de la vierge Marie, imprimez à Roüen. Il a traduit le colloque d'Erasme, en vers François, intitulé de l'Abbé, & de la femme sçavante, imprimé. Il mourut à Thurin en Piedmont, âgé de 60. ans ou environ.