B. L. JEAN DE MOREL gentilhomme, natif d'Ambrun en Dauphiné, (& non pas en Provence, comme pensent aucuns) maistre d'hostel ordinaire de la maison du Roy, & gouverneur de Monsieur le grand Prieur B. d'Angoulesme &c. Cetui-cy estoit homme for docte en Grec & en Latin, & sçavoit bien escrire en François, tant en vers comme en prose. Messieurs d'Aurat, Ronsard, du Bellay, & plusieurs autres excellents Poetes de nostre temps, l'ont for celebré en leurs oeuvres, & encores se voit un recueil de plusieurs Epitaphes Grecs, Latins & François, faits sur sa mort, par les plus celebres hommes de nostre temps, imprimé à Paris l'an 1583. Je n'ay point veu de ses escrits imprimez, mais lon peult assez juger de sa suffisance, tant par l'instruction qu'il a donnee à Monseigneur le grand Prieur (lequel il avoit en charge dés ses plus tendres ans, & auquel il a tellement fait apprendre les bonnes lettres, & la langue Grecque & Latine, que lon peult bien sans se tromper, assueurer pour chose veritable, que c'est l'un des plus doctes princes de toute la rance, voire de toute l'Europe) que pour avoir pris alliance avecques une si sage, docte & vertueuse Damoiselle, comme estoit sa defuncte femme Antoinette de Loynes, duquel mariage sont issuës ces trois Damoiselles, Camille, Lucrece & Diane de Morel, estimees des plus doctes de nostre temps, comme nous l'avons ja declaré par cy devant, sans en faire plus ample mention en cet endroit. Il mourut à Paris le dixneufiesme jour de Novembre l'an 1581. Je parleray de ses escrits Latins autre-part.