LOVIS LE ROY, DIT REGIVS, natif de Coutances ou Constances en Normandie, lecteur du Roy en Philosophie à Paris, homme tresdocte, grand historien & orateur. Enquoy lon peult admirer le pays de Normandie estre tres-fertil à produire une infinité d'hommes de grande erudition & d'un esprit esmerveillable: car outre ceux que nous avons nommez cy devant (lors que nous avons fait mention de Guy le Febvre, sieur de la Boderie) lesquels ont pris naissance audit pays de Normandie, sçavoir est de M. Postel, la Boderie & ses freres, Guersens, les du Perron pere & fils, Jaques le Gras, les Chevaliers surnommez d'Agneaux &c. Nous y adjousterons encores ceux-cy, desquels je ne m'estois souvenu pour lors, sçavoir est Messieurs de Silly, du Plessis Marly, les Gosselins, les Morels, Louis le Roy dit Regius, Leger du Chesne, dit Leodegarius à Quercu, Richard Dinot, d'Alechamps, Iean Doublet, Ch. Toutain, Guillaume Gueroult, Nicolas Fileul, Nic. Maillart, Talpin, le Seneschal, Vigor, le Hongre, Tallebot, de la Bigne, & autres en nombre infiny, desquels je feray plus ample mention autre-part: & si je les vouloy tous nommer, j'en mettroy plus de trois cent, qui tous ont escrit & composé des oeuvres tant en Latin qu'en François: mais je reserve cecy à dire autre-part, & ne parle icy que de ceux de nostre temps. Cetui-cy Louis le Roy a escrit en nostre langue Françoise, les oeuvres qui s'ensuyvent. De la Vicissitude, ou varieté des choses en l'univers, & concurrence des armes & des lettres, par les premieres & plus illustres nations du monde, imprimé à Paris chez Pierre l'Huillier l'an 1577. & depuis encores par plusieurs fois. Exhortation aux François, pour vivre en concorde, & joüir du bien de la paix, imprimee à Paris chez Jaques du Puis l'an 1570. Project ou dessein du Royaume de France, pour en representer en dix livres l'Estat entier, soubs le bon plaisir du Roy, imprimé chez Federic Morel l'an 1570. Les Monarchiques, qui est un traicté touchant la Monarchie, & des choses requises à son establissement & conservation: avec la conference des Royaumes & Empires plus celebres du monde, anciens & modernes &c. le tout imprimé à Paris chez Jaques du Puis l'an 1570. & chez Federic Morel. Discours sur le Royaume des Perses & de la nourriture de leurs Rois, extraict du troisiesme livre des loix de Platon, imprimé à Paris chez Federic Morel l'an 1562 Traicté des troubles & differents advenants entre les hommes, pour la diversité des religions: ensemble du commencement, progrez & excellence de la religion chrestienne, imprimé à Paris l'an 1569. chez Federic Morel. Deux oraisons Françoises, prononcees par luy à Paris l'an 1576. en Febvrier, avant la lecture de Demosthene, Prince des Orateurs, la premiere est des langues doctes & vulgaires, & de l'usage de l'eloquence, & l'autre traicte de l'estat de l'ancienne Grece, depuis son commencement jusques à ce qu'elle fust asservie par les Macedoniens: elles ont esté imprimees à Paris chez Federic Morel l'an 1576. Voilà quant à ses inventions, s'ensuyvent maintenant ses traductions. Traductions de Grec en François, par Louis le Roy. Les politiques d'Aristote & de Platon, avec les commentaires ou expositions, imprimees à Paris. Le Symbole ou banquet de Platon, avec de for doctes annotations dudit Louis le Roy: ce livre traicte de l'amour & de beauté, & contient trois livres de commentaires sur iceluy, imprimé à Paris par Robert le Mangnier l'an 1559. L'exhortation d'Isocrates à Demoniq, pleine d'enseignements pour induire les hommes à vivre honestement & aimer la vertu. L'oraison du regne & de la maniere de bien regner. Le Symmachique, ou du debvoir du Prince envers ses subjects, & des subjects envers leur Prince. Le premier livre de l'Institution de Cyrus ou du Prince parfait, escrite par Xenophon. Les loüanges d'Agesilas, Roy des Lacedemoniens. Le tout imprimé à Paris chez Jean Longis & Robert le Mangnier l'an 1560. Traicté du bien advenant aux Princes freres, de leur amitié mutuelle, & bonne intelligence entre-eux &c. traduit du Grec de Xenophon, imprimé à Paris par Federic Morel l'an 1575. Il a davantage traduit le Phedon, le Tymee, le Sympose, & la Politie de Platon, contenant dix livres de la Republique ou de la Justice, ausquels il a adjousté trois livres de l'ame, escrits par Aristote, avec ses Etiques & Politiques, le tout imprimé à Paris. Les oraisons politiques de Demosthene, avecques quelques livres d'Isocrates & de Xenophon. Trois Olympiques, & quatre Philippiques de Demosthene autheur Grec, imprimees à Paris. Traicté d'Aristote, touchant les changements, ruines, & conservations des Estats publiqs, avecques les causes & remedes des emotions civiles, ensemble les annotations ou commentaires sur ledit livre d'Aristote, faits par ledit Regius, le tout imprimé à Paris chez Federic Morel l'an 1566. Le livre de Theophraste, touchant le feu & les vents. Traicté d'Hipocrates, touchant l'air des eaues, & differences des lieux & parties du monde. Sermon de la providence & justice divine, escrit par Theodorite Evesque de Cyropoli, ancien Philosophe & grand Theologien. Il a davantage traduit de Latin en François l'oraison du seigneur Jean de Zamochie Polonnois, sur la declaration de l'election du Roy de Polongne, & pourquoy il a esté preferé aux autres competiteurs &c. imprimee à Paris chez Federic Morel l'an 1574. Il a escrit plusieurs livres en Latin, & entre-autres la vie de Guillaume Budé, qui fut le premier livre qui le fist cognoistre & le mettre en grande renommee, comme nous dirons autre-part faisant mention de ses escrits Latins. Il mourut à Paris soubs le regne du Roy Henry troisiesme, sans avoir amassé beaucoup de biens de fortune, se contentants de ceux de l'esprit &c.