JEAN DE LA LANDE, natif de Bretagne, gentilhomme de la maison de Monsieur le Duc d'Anghien ou d'Anguyen. Il a traduit de Grec en François l'histoire de Dictis de Crete, traictant des Guerres de Troye, & du retour des Grecs en leurs pays, apres Ilion ruiné, imprimee à Paris, par Estienne Grouleau, l'an 1556. ledit sieur de la Lande eut la teste trenchee à Paris l'an 1560. ou environ, pour avoir mal versé en quelques de ses charges, les uns disent que ce fut pour avoir contrefait les seaux ou bien le cachet du Roy, je n'en peux rien juger au vray. Mathurin Heret Medecin au Mans avoit traduit ledit livre de Dictis de Crete & de Dares, de Phrygie, auparavant ledit Jean de la Lande, comme nous dirons cy apres.