MATHVRIN HERET, docteur en medecine en l'Université de Paris, & faisant profession d'icelle en la ville du Mans &c. homme bien docte & bien versé en plusieurs arts & sciences. Il est natif de la parroisse du Breil pres Connerray à cinq lieuës du Mans: ce que je suis bien aise de dire, pour le voisinage dudit lieu du Breil, for proche de la seigneurie de la Croix au Maine &c. Il a traduit de Grec en François, les problemes d'Alexandre Aphrodisee, excellent medecin & ancien philosophe, avec annotations bien doctes dudit Heret, & avecques plus de soixante problemes de son invention, le tout imprimé à Paris chez Guillaume Guillard l'an 1555. Il a traduit de Grec en François, le Sympose ou Banquet de Platon, avant que Louis le Roy dit Regius eust fait imprimer sa traduction. Ledit livre traduit par Mathurin Heret a esté imprimé à Paris, il y a pres de trente ans. Il a traduit de Grec en François, les histoires de Dictis de Crete, & de Dares Phrygien, auparavant que Jean de la Lande gentilhomme Breton, les eust traduites. Discours sur les Mathematiques, non encores imprimez. Traicté contre l'Arrest donné au Parlement de Dole en Bourgongne, touchant un homme transmué en loup-garou, non encores imprimé. Je ne fay point icy mention de ses poëmes Latins & autres oeuures de sa profession: Je me reserve à en parler dans ma Bibliotheque Latine. Il florist au Mans cette annee 1584. exerceant for heureusement la medecine, & travaillant sans cesse, afin de profiter au public en toutes sortes.