FRESSE, Evesque de Bayonne. Il a escrit un livre, intitulé livre premier des Estats, & maisons plus illustres de la Chrestienté, imprimé à Paris l'an 1549. chez Vincent Sertenas. Il florissoit du temps de Henry second, audit an 1549.

B. L. JEAN DE FRESSE, Evesque de Bayonne, appellé par aucuns le sieur de Fresnes, Ambassadeur pour le Roy Henry second en Almagne l'an 1552. Il a escrit un livre intitulé le premier livre des Estats & maisons plus illustres de la Chrestienté, imprimé à Paris l'an 1549. chez Vincent Sertenas, sans que le nom dudit Evesque y soit mis. Il harangua pour son maistre Henry second Roy de France, en une Diete des Princes de l'Empire l'an susdit 1552. cette harangue se trouve enregistree és commentaires de celuy qui a escrit de l'Estat & l'Empire & religion d'iceluy. François Balduin J. C. fait mention dudit de Fresse en son Panegyric, sur le mariage du Roy Charles 9. & celuy qui a escrit les faits & gestes du Roy Henry second, en parle aussi.

JEAN DES MONSTIERS, surnommé la Fresse. Il a traduit de Latin en François, l'histoire de Paule Emile Italien, touchant les vies des Rois de France &c. imprimee à Paris. Le Microcosme ou petit monde, qui est un poëme François divisé en trois livres, & contient trois mille vers & plus. Il a esté imprimé à Lyon par Jean de Tournes l'an 1562. L'autheur des additions au promptuaire des Medailles, parlant de Maurice Sceue Lyonnois, dit qu'il est autheur dudit livre appellé le Microcosme: nous parlerons de cecy autre-part.