JEAN FROISSART, natif de Valenciennes en Haynault, Thresorier & Chanoine de Chimay. Cestui-cy a esté l'un des plus renommez historiens de France. Il a escrit les Chroniques de France, d'Angleterre, d'Escosse, d'Espagne, de Bretagne, Gascongne, Flandres, & lieux d'alentour, ou circonvoisins, le tout reduit en trois volumes, imprimez à Paris l'an 1505. par Michel le Noir & autres. Il commence son histoire dés l'an de salut 1326. jusques en l'an 1390. & 1391. son histoire ou Chronique a esté reveuë & recorrigee par Denis Sauvage, sieur du Parc, natif de Fontenailles en Brie &c. & imprimee à Paris chez Sonnius & autres depuis peu de temps en ça (comme nous avons dit cy dessus parlant dudit sieur du Parc.) Il florissoit l'an 1326. & son histoire a esté suyvie par Monstrelet & autres.