B. L. NICOLE ORESME, docteur en Theologie, grand maistre du college de Navarre, fondé à Paris, chanoine de la Saincte Chapelle en laditte ville. Il fut esleu Evesque de Lysieux en Normandie l'an 1377. & selon autres, il estoit Evesque de Bayeux, precepteur de Charles 5. Roy de France l'an 1364. Il a traduit à la requeste, & par commandement du Roy Charles 5. son maistre les Ethiques, Politiques, & Oeconomiques d'Aristote, & plusieurs livres de Ciceron & autres autheurs. Il a traduit la Bible de Latin en François. Il a escrit un traicté des Monnoyes, tant en langue Latine que Françoise: le Latin se trouve imprimé, & quant à la traduction Françoise, nous l'avons par devers nous escrite à la main sur parchemin de for belle escriture, il contient 26. chapitres. Il a traduit de Latin en François le livre de François Petrarque, des remedes de l'une & de l'autre fortune, prospere & adverse, imprimé à Paris l'an 1534. in 4. & contient 35 fueilles. Il a traduit les livres d'Aristote du Ciel & du Monde, par le commandement du Roy Charles 5. lequel luy donna pour recommpense l'Evesché de Lysieux, comme j'ay leu dans l'epistre de M. Jean Gosselin, garde de la Bibliotheque du Roy, &c. mise au devant de sa traduction du Calendier Gregorien. Plusieurs autheurs font mention dudit Nicolas Oresme, sçavoir est Loys Lasseré en la vie de S. Hierosme fol. 379. & Jean Du-Tillet aux Chroniques de France, & encores Papyrius Masson en ses Annales, lequel en cinq ou six endroits, l'appelle Nicolaus Oresimus au lieu de Oresmius, mais c'est la faulte de l'imprimeur & non de l'autheur.